मुसिकोट । आज र भोली रुकुम पश्चिमका तीन स्थानीय तहमा कोरोना विरुद्धको चिनियाँ खोप ‘भेरोसेल’ को पहिलो मात्रा लगाइदै छ । जिल्लाको आठबीसकोट नगरपालिका, बाँफिकोट गाउँपालिका र त्रिवेणि गाउँपालिकामा आज र भोली भेरोसेलको पहिलो डोज लगाउन लागिएको हो ।
६२–६४ वर्ष उमेर समुहका नागरिकलाई खोप लगाईने स्वास्थ्य सेवा कार्यालयकी खोप सुपरभाइजर अधिकृत कृष्णा खड्काले जानकारी दिनुभयो । उहाँका अनुसार तीन स्थानीय तहका सबै अस्पताल, प्राथमिक स्वास्थ्य केन्द्र, स्वास्थ्य चौकी र केहि आधारभुत स्वास्थ्य इकाईहरुमा खोप लगाईने छ ।
बिहान १० बजेदेखि अपरान्ह ४ बजेसम्म खोप लगाउन सकिनेछ । नागरिकता वा उमेर खुल्ने परिचयपत्र लिएर खोप लगाउन सकिने खोप सुपरभाइजर अधिकृत खड्काले बताउनुभयो ।
यसअघि पहिलो चरणमा जेठ २६ र २७ गते जिल्लाका तीन स्थानीय तह मुसीकोट नगरपालिका, चौरजहारी नगरपालिका र सानीभेरी गाउँपालिकाका ६२–६४ वर्ष उमेर समुहका नागरिकहरुलाई खोप लगाईएको थियो ।
