कर्णाली प्रदेश सरकारले विपन्न समुदायको लागि एकीकृत बस्ती विकास गर्न ४८ करोड ९५ लाख रुपैयाँ विनियोजन गरेको छ ।
प्रदेश सरकारका आर्थिक मामिला तथा योजनामन्त्री विन्दमान विष्टले आगामी आर्थिक वर्ष २०७९/८० का लागि बजेट प्रस्तुत गर्दै स्थानीय तहसँगको समन्वय र साझेदारीमा एकीकृत बस्ती विकास, जनता आवास र विपन्नको घर कार्यक्रमको लागि ४८ करोड ९५ लाख विनियोजन गरेको जानकारी दिनुभयो ।
उनकाअनुसार ती कार्यक्रमबाट कर्णाली प्रदेश भित्रका विपन्न, बादी, गाइने, राउटे, बोटे, राजी, दलित, मुसलमान तथा लोपोन्मुख र अति सीमान्तकृत जाति वा समुदाय एवम् विपन्न वर्ग तथा जोखिमयुक्त र छरिएका बस्तीलाई सुरक्षित स्थानमा आवासको व्यवस्था गरिनेछ ।
