रुकुम पश्चिम । रातभर परेको अविरल वर्षाका कारण आएको पहिरोले रुकुम पश्चिमको बाँफिकोट गाउँपालिका-४ स्यापुर्दह ( नेटाबजार) जाने सडक खण्डमा रहेका घर तथा पसलहरु बगाएको छ । राती करिब २:३० बजे पहिरो जाँदा सामान सहितका तीन वटा घुम्ती पसल बगाएको हो ।
स्थानीय डिल्ली परियार, विवेक शाही र विनोद शाहीको घुम्ती पसल पहिरोले बगाएको स्थानीय शेरविर विकले जानकारी दिएका छन । स्थानीय डिल्ली परियार, बृद्धिराम केसी र शेरविर विकको घर पहिरोको उच्च जोखिममा रहेका छन ।
पहिरोले पसल बगाउँदा करिब १० लाख बराबरको क्षति भएको जिल्ला प्रहरी कार्यालय रुकुम पश्चिमले जानकारी दिएको छ ।
यस्तै बाँफिकोट गाउँपालिका–९, स्यालाको एक घर गएराति पहिरोले बगाउँदा दुई जनाको मृत्यु भएको हो । स्थानीय जसबीर कामीको घर पहिरोले बगाउँदा उनका छोरा २२ वर्षीय नवीन विक र छिमेकी हस्तबहादुर सुनारका छोरा १६ वर्षीय बलबहादुर सुनारको मृत्यु भएको प्रहरीले जनाएको छ ।
