सुर्खेत । जुम्लामा भीषण आगलागीबाट घर र पशु जलेर नष्ट भएका छन् । जिल्लाकाे तिला गाउँपालिका-७, पोखरीस्थित गोठीगाउँमा मंगलबार बेलुकी भएको भीषण आगलागीबाट ३२ घर र ७० पशु चौपाया जलेर नष्ट भएका हुन ।
आगलागीबाट ३२ घर जल्नुका साथै १७ गाई, २३ गोरु र ३० बाख्राको मुत्यु भएको कर्णाली प्रदेश प्रहरी कार्यालय सुर्खेतले जनाएको छ । आगलागीबाट मानवीय क्षति भने भएको छैन ।
स्थानीय परबहादुर रोकायको घरमा खाना पकाउने चुलोको पाइपबाट आगोको झिल्का निस्केर छानामा सल्किएको प्रदेश प्रहरी कार्यालयले जनाएको छ ।
आगलागीबाट करिब तीन करोड रुपैयाँ बराबरको क्षति भएको अनुमान गरिएकाे छ । सडक नपुगेको ठाउँ, भिरालो बस्ती र घरमा तलदेखि माथिसम्म एकैपटक आगलागी हुँदा समयमा नियन्त्रणमा लिन कठिन भएको र धेरै धनमालको क्षति भएको प्रहरीको भनाइ छ ।
