रुकुमकोट । रुकुम (पूर्व) मा ट्याक्टर दुर्घटना हुँदा दुई जनाको मृत्यु भएको छ । सिस्ने गाउँपालिका वडा नम्बर ४ दादीङमा रा १ त १६१६ नम्बरको ट्याक्टर शुक्रबार साँझ दुर्घटना हुँदा दुई जनाको मृत्यु भएको प्रहरीले जनाएको छ ।
ट्याक्टर वडा नम्बर ४ कै कोम्बोटबाट गिट्टी लोड गरेर दादीङतर्फ जाँदै गरेको थियो ।
दुर्घटनामा परी सिस्ने गाउँपालिका वडा नम्बर ४ दादीङका १५ वर्षका आकाश बुढा र सोहि वडाका ५० वर्षिया नन्दि बुढाको मृत्यु भएको जिल्ला प्रहरी कार्यालय रुकुम (पूर्व) का प्रहरी निरीक्षक कृष्ण खत्रीले जानकारी दिनुभयो ।
उहाँका अनुसार दुर्घटनामा परी दादीङकै ५९ वर्षीया ओइली पुन र ४५ वर्षका रुद्रबहादुर मल्ल घाइते भएका छन् । दुवै घाईतको अहिले रुकुम (पूर्व) अस्पतालमा उपचार भइरहेको छ ।
घटनाको अनुसन्धान भइरहेको प्रहरी निरीक्षक खत्रीले जानकारी दिनुभयो । ट्याक्टर चालक फरार रहेको र उनको खोजी भइरहेको प्रहरीले जनाएको छ ।
