मुसिकोट । रुकुम पश्चिममा मतगणना सुरु गरिएको छ ।
मंगलबार बिहान ८ः४० बजेबाट जिल्ला समन्वय समिति रुकुम पश्चिममा रहेको मुख्य निर्वाचन अधिकृतको कार्यालयमा मतगणना सुरु गरिएको हो ।
मुख्य निर्वाचन अधिकृतको कार्यालयका अनुसार प्रतिनिधि सभा र प्रदेश सभा निर्वाचन क्षेत्र नं. १ को मतगणना सुरु गरिएको छ । अहिले बाँफिकोट गाउँपालिका वडा नम्बर ४ मा रहेको बिरेन्द्र माविमा रहेको (क) र (ख) मतदान केन्द्रको मतगणना सुरु गर्न लागिएको सहायक मुख्य निर्वाचन अधिकृत कृतबहादुर बोहराले जानकारी दिनुभयो ।
सोमबार जिल्लाका सात मतदान केन्द्रको पुनः मतदान माग गर्दै मतदगणना प्रक्रिया बहिष्कार गर्ने जनाएको नेकपा एमाले रुकुम समेत मतगणना प्रक्रियामा सहभागी भएको छ । मतगणना कार्यलाई चुस्त, दुरुस्त र छिटो अनि सुरक्षित बनाउन आवश्यक सम्पूर्ण प्रयास गरेको मुख्य निर्वाचन अधिकृत खड्कबहादुर केसीले जानकारी दिनुभयो ।
रुकुम पश्चिममा १ लाख ४ हजार २ सय ८० मतदाता रहेकामा ६० हजार ५ सय २७ मत खसेको छ ।
