सुर्खेत । ‘हिमनदी संरक्षण’ भन्ने मूल नाराका साथ आज विश्वभर विभिन्न कार्यक्रम गरी पानी दिवस मनाईएकाे छ।
कर्णाली प्रदेशमा पनि विश्व पानी दिवसको अवसरमा खानेपानी गुणस्तर परीक्षण एवं एन वास अध्यावधिक सम्बन्धी तालिम सम्पन्न भएको छ ।
चार दिनसम्म सञ्चालन भएको तालिममा सहभागीलाई राष्ट्रिय खानेपानी गुणस्तर मापदण्ड तोकिएको मध्ये ५ वटा पारामिती परिक्षण गर्न सिकाईएको जलश्रोत तथा उर्जा विकास मन्त्रालय सुर्खेतकी शाखा अधिकृत कमला खानले बताउनुभयो । त्यसमा खानेपानी गुणस्तर परीक्षण किट चलाउन तथा खानेपानी सरसफाई तथा स्वच्छताको राष्ट्रिय सूचना व्यवस्थापन प्रणालीमा तथ्यांक अध्यावधिक गर्न सिकाइएको उहाँको भनाइ छ । त्यसैगरी पानीको धमिलोपना, पीएच, कोलिफर्म ब्याक्टेरिया तथा क्लोरिन अवशेष परिक्षण गर्न सिकाइएको उहाँको भनाइ छ। पानी गुणस्तर परीक्षणको प्रक्रिया र त्यसको नतिजालाई सबैमाझ जानकारी गराउन खोजिएको शाखा अधिकृत खानले बताउनुभयो ।
कर्णाली प्रदेशमा ३.५ प्रतिशत मात्र सुरक्षित रुपले ब्यवस्थित खानेपानीको पहुँच रहेको छ । प्रदेशभर सुरक्षित रुपले ब्यवस्थित खानेपानीको पहुँच बढाउन कर्णाली प्रदेश सरकार जलश्रोत तथा उर्जा विकास मन्त्रालयले युनिसेफ र विश्व स्वास्थ्य संगठनको सहयोगमा १० जिल्लाका खानेपानी संग सम्बन्धित प्राविधिक, विभिन्न पालिकाका वास फोकल पर्सन तथा खानेपानी संस्थाका प्रतिनिधिलाई तालिम दिएको हो ।
तीन वटै तहको सरकार र विकास साझेदारहरुको संलग्नतामा कर्णालीका ७५ वटा पालिकामा खानेपानी सरसफाई तथा स्वच्छता योजना बनिसकेको र बाँकीमा बनिरहेको मन्त्रालयका सूचना अधिकारी बिपिन ज्ञवालीले जानकारी दिनुभयो ।
