मुसिकोट । रुकुम पश्चिममा अवैध रुपमा लगाइएको अफिम खेति प्रहरीले नष्ट गरेको छ ।
ईलाका प्रहरी कार्यालय आठबिसकोटबाट खटिएको प्रहरी टोलीले आठबिसकोट नगरपालिका १२ ठुलीबार्खुमा लगाएको अफिमका बोटहरु नष्ट गरेको हो ।
जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक ऋषि पाठकका अनुसार ठुलीबार्खुका विभिन्न आठ स्थानको पाँच रोपनी जग्गामा गैरकानूनी रुपमा लगाएको लागुपदार्थ अफिमका बोटहरु पूर्ण रुपमा नष्ट गरिएको हो ।
फूल फुलेको अवस्थामा रहेका अफिमका बोटहरु प्रहरी निरीक्षक गणेश खनालको कमाण्डमा रहेका १० जनाको प्रहरी टोलीले नष्ट गरेको हो । अफिम गहुँखेतीको बिचमा र पाखो बारीमा लगाउने गरिएको पाईएको प्रहरीले जनाएको छ । रुकुम पश्चिमस्थित प्रहरीले विभिन्न समयमा अवैध रुपमा लगाईएको अफिम खेती फडानी गर्दै आईरहेको छ ।
सोहि टोलीले शुक्रबार आठबिसकोटका विभिन्न स्थानमा सुरक्षा गस्ती समेत गरेको छ । यस क्रममा शान्ती सुरक्षा र अपराधिक गतिविधि नियन्त्रण सम्बन्धि जनप्रतिनिधि र स्थानीयवासीहरु अन्तरक्रिया समेत गरिएको थियो ।
