काठमाडौँ । सरकारले नेपाल प्रहरीको ३२ औं महानिरीक्षक (आईजीपी) मा चन्द्र कुवेर खापुङलाई नियुक्त गरेको छ। शुक्रबार बसेको मन्त्रिपरिषद्को बैठकले खापुङलाई आईजीपीमा नियुक्त गर्ने निर्णय गरेको हो।
हाल प्रहरीको केन्द्रीय अनुसन्धान ब्युरो (सीआईबी) का प्रमुख रहेका एआईजी खापुङ भदौ १८ गतेदेखि आईजीपीको जिम्मेवारी सम्हाल्नेछन्। सरकारले मन्त्रिपरिषद् बैठकमार्फत उनलाई नेपाल प्रहरीको सर्वोच्च पदमा नियुक्त गरेको एक मन्त्रीले जानकारी दिए।
तेह्रथुममा जन्मिएका खापुङ २०५२ सालमा नेपाल प्रहरी सेवामा प्रवेश गरेका थिए। करिब तीन दशकको सेवाअवधिमा उनले विभिन्न महत्त्वपूर्ण जिम्मेवारी सम्हालेका छन्।
प्रधानमन्त्रीको सुरक्षा प्रमुख, प्रहरी प्रधान कार्यालयको कर्मचारी प्रशासन विभाग प्रमुख, काठमाडौं उपत्यका अपराध महाशाखा प्रमुख, कोशी प्रदेश प्रहरी प्रमुख लगायतका महत्त्वपूर्ण भूमिका निर्वाह गरिसकेका छन्।
