तुलसीपुर । तुलसीपुर उपमहानगरपालिका अन्तर्गतको रक्षाचौरमा एकै परिवारका चार जना दृष्टिविहीन छन् । रक्षाचौर गणेश टोलमा बस्दै आउनुभएका रूपा गन्धर्वका चार सन्तान नै दृष्टिविहीन छन् । २०६८ सालमा श्रीमान्ले दृष्टिविहीन सन्तान जन्माएको भन्दै घरबाट निकालेपछि रूपा चार जना सन्तान लिएर एक्लै बस्दै आउनुभएको छ ।
रूपा गन्धर्वका छोरा गणेश गन्धर्व, छोरीहरू गङ्गा गन्धर्व र जमुना गन्धर्व दृष्टिविहीन हुनुहुन्छ भने जेठी छोरी मनीषा गन्धर्व दृष्टिविहीन तथा मानसिक र शारीरिक रूपमा पनि अपाङ्गता हुनुहुन्छ । श्रीमान्ले छाडेर गएका र चारै जना सन्तान दृष्टिविहीन भएका कारण रूपालाई सन्तानको पालनपोषणमा सकस पर्दै आएको छ । रूपाका लागि साँझ बिहानको छाक टार्नका लागि चाडपर्व र कसैको जन्मोत्सवका अवसरमा दिइने दाल, चामल, नुन, तेलले केही समाधान गरे पनि समस्या पर्दै आएको बताउनुहुन्छ ।
रूपाको दृष्टिविहीन परिवारका लागि तुलसीपुरका व्यवसायी, पत्रकारको एक टोलीले २०८२ वैशाख महिनादेखि रक्षाचौर गणेश टोलनजिकै चारकोठे घर बनाउने अभियान थालेको थियो । अभियान थालेको पाँच महिनासम्म रूपाको घर त ठडिएको छ तर घरको गारो ठडिएको महिना दिन पुग्दासमेत अझै जस्ताले छाइएको छैन । रूपा गन्धर्वले भन्नुभयो, “बर्खामै नयाँ घरमा सर्न पाइन्छ कि भन्ने आशा थियो तर घरभित्र पस्न पाइएन ।
घर निर्माण अभियानका सदस्यसचिव शरद रेग्मीले विभिन्न दाताको सहयोगमा घर निर्माण सुरु गरिएको बताउनुभयो । उहाँले २०८२ सालको दसैँअगावै रूपाको परिवारलाई घर हस्तान्तरण गरिने बताउनुभयो । रूपाका तीन सन्तान भने नजिकै रहेको गुरुजजुर माध्यमिक विद्यालयमा अध्ययरत छन् । जेठा छोरा गणेश गन्धर्व कक्षा ११, गङ्गा ७ र जमुना कक्षा ६ मा अध्ययरत छन् ।
रूपाले तिनै जना सन्तानको पढाइलेखाइ, पालनपोषण नयाँ वर्ष, दसैँ र व्यक्तिको जन्मदिनका दिन कपडा, खानेकुरा र आर्थिक सहयोगबाट गर्दै आएको बताउनुभयो । गणेश टोल विकास संस्थाका अध्यक्ष गणेश गन्धर्वले रूपाको घर निर्माणका लागि जग्गा व्यवस्थापनमा सहजीकरण गरेको बताउनुभयो । गोरखापत्र अनलाइनबाट
