सल्यान । सल्यानमा बहुविवाहको आरोपमा वडाध्यक्ष पक्राउ परेका छन्। जिल्लाको वनगाड कुपिण्डे नगरपालिका वडा नम्बर ९ का वडाध्यक्ष इन्द्रबहादुर कुमाईलाई प्रहरीले प्रक्राउ गरेको हो।
उनलाई प्रहरीले शुक्रबार बेलुका जयतपानी बजारबाट पक्राउ गरेको जिल्ला प्रहरी कार्यालयका प्रवक्ता प्रहरी निरीक्षक लक्ष्मण ओलीले जानकारी दिएका छन । वडाध्यक्षसँगै उनकी कान्छी श्रीमती भनिएकी ग्वाँमी विष्ट कुमाईलाई पनि प्रहरीले पक्राउ गरेको छ।
प्रवक्ता ओलीका अनुसार आफ्नो घरमा दुई श्रीमती हुँदाहुँदै तेस्रो विवाह गरेका थिए। उनका दुई श्रीमतीबाट ४ छोराछोरी छन्। दुई जना श्रीमती हुँदाहुँदै तेस्रो विवाह गरेको भन्दै पाँच जना स्थानीयले जिल्ला प्रहरी कार्यालय सल्यानमा जाहेरी दिएका थिए।
जाहेरीको आधारमा जिल्ला अदालत सल्यानबाट पक्राउ अनुमति लिई दुई जनालाई पक्राउ गरेको हो। दुवै जनालाई जिल्ला प्रहरी कार्यालय सल्यानको हिरासतमा राखी प्रहरीले थप अनुसन्धान गरिरहेको छ।
