जिल्ला समन्वय समिति दैलेखको प्रमुखमा कांग्रेसबाट बागी उम्मेदवार निर्वाचित भएका छन्। आज भएको जिससको निर्वाचनमा बागी उम्मेदवार नमराज शाही समन्वय प्रमुखमा निर्वाचित हुनुभएको हो ।
कांग्रेसका जिल्ला उपसभापतिसमेत रहनुभएका शाही नेकपा एमालेको सहयोगमा समन्वय प्रमुख बन्नुभएको हो ।
एमालेसँग भएका १० वटा मतसहित शाहीले १३ मत ल्याउनु भएको थियो । गठबन्धनको तर्फबाट आधिकारिक उम्मेदवार कांग्रेसकी दुर्गा श्रेष्ठले ९ मत प्राप्त गर्नुभएको थियो ।
यस्तै उपप्रमुखमा एमालेका केशवबहादुर शाही ११ मतसहित निर्वाचित हुनुभएको छ । नेकपा (एकीकृत समाजवादी) बाट उम्मेदवार शान्ति शाहीले १० मत प्राप्त गर्नुभएको थियो ।
महिला सदस्यमा नेकपा ९एस० का कविताकुमारी गिरी, कोकिलाकुमारी खड्का र पूर्ण विक निर्वाचित हुनुभएको छ । दलित सदस्यमा माओवादी केन्द्रका तुल्सा विक निर्वाचित हुनुभएको छ ।
यस्तै खुला सदस्यहरूमा नेपाली कांग्रेसका अड्गबहादुर शाही, माओवादी केन्द्रका पत्तबहादुर डाँगी र बागी उम्मेदवार डिलबहादुर शाही निर्वाचित हुनुभएको हो ।
जिल्ला समन्वय समिति दैलेखको निर्वाचनमा नेपाली कांग्रेस र माओवादीबीच गठबन्धन गरिएको थियो।
