मुसिकोट । रुकुम पश्चिमको एक सामुदायिक वन उपभोक्ता समुहको रकम हिनामिना गरेको आरोपमा समुुहका अध्यक्ष पक्राउ परेका छन् ।
आठविसकोट नगरपालिका २ पहाडास्थित लालझाडि सामुदायिक वन उपभोक्ता समुहका अध्यक्ष ३१ वर्षिय भद्रबहादुर थापालाई डिभिजन वन कार्यालय रुकुम पश्चिमले पक्राउ गरेको हो ।
सामुदायिक वनको आर्थिक रकम हिनामिना गरेको तथा प्रमाण नष्ट गरेको आरोपमा थापालाई पक्राउ गरिएको डिभिजन वन कार्यालय रुकुम पश्चिमका निमित्त डिभिजन प्रमुख शेरबहादुर परियारले जानकारी दिनुभयो ।
यही साउन ४ गते नेपाल प्रहरीको सहयोगमा आठविसकोट नगरपालिकाको तल्लुबगरबाट थापालाई पक्राउ गरिएको हो । पक्राउ परेका थापालाई जिल्ला प्रहरी कार्यालयको हिरासतमा राखिएको र अनुसन्धान अगाडि बढाईएको बताईएको छ ।
थापा बिरुद्ध अनुसन्धानको लागि मंगलबार रुकुम जिल्ला अदालतबाट १२ दिनको अनुमति समेत लिईएको छ ।
डिभिजन वन कार्यालयका निमित्त डिभिजन प्रमुख परियारले वन ऐन, २०७६ दफा ४९ अनुसार थापा विरुद्ध कारबाहिको प्रक्रिया अगाडि बढाईने बताउनुभयो ।
