जापानका सबैभन्दा पाको उमेरका सक्रिय फुटबल खेलाडी काजुयोशी मिउराले आउँदो सिजन पनि खेल्ने भएका छन् । ५४ वर्ष लागेपछि पनि काजुयोशीले व्यवसायिक फुटबल खेल्ने तय भएको हो । जे लिग क्लब योकोहामा एफसीले उनको सम्झौता थप एक वर्षका लागि लम्ब्याएको छ ।
काजुयोशी आउँदो फेब्रुअरी २६ मा ५४ लाग्ने छन्, त्यसको भोलिपल्ट जापानिज फुटबल लिगको २०२१ को सिजन सुरु हुनेछ । जापानका पूर्व स्ट्राइकर काजुयोशीले सन् २००५ देखि योकोहामाबाट खेल्दै आएका छन् ।
आफ्नो फुटबलप्रतिको मोह लगातार बढिरहेको उनले बताएका छन् । काजुयोशीले ब्राजिलको क्लब सान्तोसबाट सन् १९८६ मा आफ्नो खेल जीवन सुरु गरेका थिए । ५० वर्षको उमेरमा सन् २०१७ मा गोल गरेर उनी जापानको व्यवसायिक लिगमा गोल गर्ने सबैभन्दा बढि उमेरको खेलाडी बनेका थिए ।
