चैत २७ काठमाडौं
एक साता अगाडि अस्गर अलीको कम्पनीले अनाधिकृत रुपमा काठमाडौं प्रेस डट कमको समाचार डिलेट गरेपछि उक्त कम्पनीसँग डेभलपमेन्ट र सर्भर सम्झौता गरेका २१ वटा बैंकहरुले झस्किएका छन् ।
अलीको कम्पनीले यस्तो हर्कत देखाएपछि उनीहरुले सम्झौता तोड्ने निष्कर्ष निकालेका छन् ।
प्रधानमन्त्री केपी शर्मा ओलीको आईटी विज्ञसमेत रहेका अस्गर अलीको लगानी रहेको एफवान सफ्टले जतिबेला जे पनि गर्नसक्ने निष्कर्ष निकाल्दै २१ वटा बैंकहरुले सम्झौता तोड्ने निर्णय गरेका हुन् ।
एफवान सफ्ट अन्तर्गतको शिरान टेक्नोलोजिजले एक साता अगाडि काठमाडौं प्रेस डट कमको साइटमा प्रवेश गरी अनाधिकृत रुपमा एउटा समाचार डिलेट गरेसंगै बैंकरहरु अस्गर अलीसँग त्रसित बनेका हुन् ।
त्यस घटनालगत्तै बैंकर्सहरुले एफवान सफ्टसँगको व्यवसायिक सम्बन्ध तोड्ने जिवषयमा छलफल गरिरहेको बताइएको छ । यसैबीच नेपाल बैंकर्स एसोसिएसनको पहलमा भर्खरै एफवान सफ्ट कम्पनीबाट सेवा लिइरहेका बैंक तथा वित्तीय संस्थाले सम्झौता तोड्ने विषयमा छलफल गरेको बताइएको छ ।
उक्त छलफलकम अधिकांश बैंकका सीईओले लकडाउन खुल्नसाथ एफवान सफ्टसँग सम्झौता तोड्नुपर्ने धारणा राखेको बताइएको छ । एफवान सफ्टअन्तर्गतको कम्पनी आफैले बनाएको न्यूज पोर्टलको समाचार हटाएपछि आफूहरु पनि सुरक्षित नभएको महसुस गरिरहेको उनीहरुको भनाइ छ ।
अस्गर अलीको कम्पनीले कतिपय बैंकहरुको डेटा होस्टिङ समेत अफैले गरिरहेको छ । तर, आफूलाई चित्त नबुझ्दा जेपनि गर्न सक्ने कम्पनीले बैंकहरुलाई पनि जुनसुकै अवस्थामा धोका दिन सक्ने निष्कर्ष निकालिएको छ ।
साथै, बैंकहरुको पेमेन्ट गेटवे, डाटा होस्टिङ एफवान सफ्टले नै गरिरहेको अवस्थामा ग्राहकहरुको विश्वास बैंकहरुमाथि नरहन सक्ने भएकाले सम्झौता तोड्ने निर्णय भएको बताइएको छ ।
