मुसिकोट । रुकुम पश्चिममा सशस्त्र द्वन्द्वको समयमा विस्थापित भई जागिर गुमाएका ५ जना शिक्षक पुनर्बहाली भएका छन् । उनीहरूले सोमबार शिक्षा विकास तथा समन्वय इकाइ रुकुम पश्चिमबाट पुनर्बहालीको पत्र बुझी दरबन्दी रिक्त रहेका विद्यालयमा हाजिर हुन गएका छन् ।
पुनर्बहाली हुने शिक्षकहरूमा ५ जना प्राथमिक तहका रहेको शिक्षा विकास तथा समन्वय इकाइ रुकुम पश्चिमले जानकारी दिएको छ ।
जिल्लाका रिक्त रहेका विद्यालयहरूमा पुनर्बहाली भएका शिक्षकहरूलाई पुनर्बहालीको पत्रसहित पठाइएको शिक्षा विकास तथा समन्वय इकाइ रुकुम पश्चिमका प्रमुख तारा प्रकाश पुनले जानकारी दिनुभयो ।
उहाँकाअनुसार पुनर्बहाली हुने शिक्षकहरु ओमप्रकाश विसीलाई त्रिवेणी गाउँपालिका, रामबहादुर बुढा मगरलाई बाँफीकोट गाउँपालिका, जीतबहादुर शाहलाई सानीभेरी गाउँपालिका, मधुसुदन अधिकारी र नरबहादुर खड्कालाई आठविसकोट नगरपालिका अन्तर्गत पदस्थापनका लागि पत्र दिएर पठाएको छ ।
सरकारले माओवादी जनयुद्ध र आन्दोलनका कारण हटाइएका शिक्षक तथा कर्मचारीहरूलाई पुनर्बहाली र क्षतिपूर्ति दिने निर्णय गरेको थियो । मन्त्रिपरिषद् बैठकले देशभरका ५८६ जना शिक्षक तथा कर्मचारी व्यवस्थापनको निर्णय गरेको थियो ।
पुनरावेदन अदालतका पूर्वमुख्य न्यायाधीश गोविन्दप्रसाद पराजुलीको अध्यक्षमा गठित कार्यदलले २०७३ मंसिरमा दिएको प्रतिवेदन अनुसार मन्त्री परिषद्ले सो निर्णय गरेको थियो ।
शिक्षकहरूले विद्यालयमा हाजिर भएको मिति देखिको तलब भत्तालगायतका सुविधा दिने तर सेवाबाट हटाइको मितिदेखि पुनर्बहाली भई हाजिर नहुन्जेलको अवधिको तलब भत्ता, बिदा, पोसाक, चाडपर्व खर्चलगायत सुविधा नदिने निर्णय गरेको थियो ।
