मुसिकोट । रुकुम पश्चिमको चौरजहारी नगरपालिकामा मेलमिलापकर्ताहरूका लागि अभिमुखीकरण कार्यक्रम सम्पन्न भएको छ।
न्यायिक समितिको क्षेत्राधिकारभित्रका मेलमिलाप गर्न सकिने विवादहरूको समाधानका लागि नगरपालिकामा सूचीकृत मेलमिलापकर्ताहरुलाई अभिमुखीकरण गरिएको हो।
शुक्रबार रुकुम जिल्ला अदालतका जिल्ला न्यायाधीश रामप्रसाद बस्यालले मेलमिलापकर्ताहरुलाई न्यायिक समितिको क्षेत्राधिकार, निरूपण र मेलमिलाप गर्न सकिने विवादका विषयमा प्रशिक्षण दिनुभयो नगरपालिकाका निमित्त प्रमुख प्रशासकीय अधिकृत शेरप्रसाद ढकालले जानकारी दिनुभयो ।
उहाँले मेलमिलापकर्ताले पालना गर्नुपर्ने आचारसंहिता र प्रतिवद्धताका बारेमा पनि जानकारी दिनुभएको थियो। कार्यक्रममा सहभागीहरूले मेलमिलाप प्रक्रिया गर्दा भोगेका समस्याहरू र तिनको समाधानका बारेमा जिज्ञासा राखेका थिए।
यसै गरी, जिल्ला न्यायाधीश बस्याल, निमित्त श्रेष्तेदार गोविन्दप्रसाद कोइराला, इजलास सहायक शशिराम विष्ट लगायतको टोलीले चौरजहारी नगरपालिकाको न्यायिक समितिको कार्यसम्पादनको अनुगमन समेत गरेका छन्। अनुगमनका क्रममा, जिल्ला न्यायाधीश बस्यालले सकारात्मक कार्यको प्रशंसा गर्दै सुधार गर्नुपर्ने पक्षहरूको बारेमा सुझाव दिनुभएको थियो।
