अब देशले काँचुली फेर्छ : प्रधानमन्त्री ओली

अब देशले काँचुली फेर्छ : प्रधानमन्त्री ओली

अशोज ३,  काठमाडौँ – प्रधानमन्त्री केपी शर्मा ओलीले मुलुकले काँचुली फेर्ने प्रतिबद्धता दोहोर्‍याएका छन् । तर त्यसका लागि सबैलाई धैर्य गर्न पनि प्रधानमन्त्री ओलीको विशेष आग्रह छ ।

संविधान दिवसको अवसर पारेर काठमाडौँको सैनिक मञ्च, टुँडिखेलमा आयोजित विशेष समारोहलाई सम्बोधन गर्दै प्रधानमन्त्री ओलीले मुलुकलाई काँचुली फेर्ने अभियानको नेतृत्वमा आफू रहेको उल्लेख गर्दै नेपाली जनताको दशकौँको सपना पूरा हुने दाबी गरे । ‘संविधान दिवसको अवसर पारेर म फेरि प्रतिबद्धता जाहेर गर्दछु, मुलुकले काँचुली फेर्छ, हाम्रा सपनाहरु पूरा हुन्छन–हुन्छन ।

यस अभियानको नेतृत्वमा म छु’ प्रधानमन्त्री ओली भनाई थियो, ‘तर त्यसका लागि धैर्य गरौँ–अढाई दशकदेखिको खजमजिएको थिति, अढाई वर्ष नपुग्दै दुरुस्त किन भएन भन्ने जस्ता प्रश्नहरुमाथि एक चोटी पुनर्विचार गरौँ ।’ प्रधानमन्त्री ओलीले मुलुक बनाउने ठोस आधार पनि प्रस्तुत गरे । ‘हामीसँग हालसम्म दोहन नगरिएका प्राकृतिक स्रोत छन् । अनुकूल जलवायु छ । राजनीतिक स्थिरता छ । तपाईंहरुको मतबाट बनेको बलियो सरकार छ । युवा क्रियाशील जनशक्ति ठूलो छ ।’

यसैलाई परिचालन गरेर मुलुकको काँचुली फेर्ने प्रधानमन्त्री ओलीको योजना छ । प्रधानमन्त्री ओलीले युवा पुस्ता छिप्पिनु अघि नै विकासको तीव्र गतिको दौड पूरा गर्नुपर्ने पनि स्पष्ट पारे । उनले जनताको मुर्छित सपनाहरुलाई साकार पार्न सरकार दृढतापूर्वक लागि परेको पनि बताए ।

प्रधानमन्त्री ओलीले संविधान कार्यान्वयनको सन्दर्भमा कोही पनि पक्ष वा प्रतिपक्ष नहुन पनि आह्वान गरे । उनले संविधान विरोधी गतिविधिमा संलग्न नेत्र विक्रम चन्द नेतृत्वको नेकपालाई पनि मूलधारमा आउन ढिलाई नगर्न पुनः आग्रह गरे । ‘हाम्रो लोकतन्त्र फराकिलो छ, कतिपय अतिवादी सोच र संस्थाहरुलाई पनि यसले यसै अवधिमा मूलधारमा फर्काउन सफल भएको छ ।’

प्रधानमन्त्री ओलीको आग्रह छ, ‘जो अझै बाटो भुलिरहेका छन, उनीहरुले पनि मूल धारमा आउन ढिलाई गर्नु हुन्न ।’ प्रधानमन्त्री ओलीले राजनीतिक आन्दोलनको चरण समाप्त भएको उल्लेख गर्दै राजनीतिको नाममा शान्ति, सुरक्षा र मुलुकको राष्ट्रिय एकतालाई खल्बल्याउने खालका संविधान र कानून विपरितका गतिविधिलाई सरकारले कडाईका साथ रोक्ने चेतावनी पनि दिए ।

त्यस अवसरमा प्रधानमन्त्री ओलीले आफू नेतृत्वको सरकारले हालसम्म हासिल गरेको उपलब्धीहरुको चर्चा गर्दै समृद्ध, सुःखी र सभ्य मुलुक निर्माण हुने आधार तय गरिएको पनि बताए ।

उजेली न्यूज
हरेकपल ताजा समाचार

प्रतिक्रिया दिनुहोस्

सम्बन्धित समाचार