ऋण दिएर गाउँलेलाई उठिबास गराउने साहुकार श्यामकृष्ण साह (श्याम परदेशी)लाई सर्लाही जिल्ला अदालतले शुक्रबार ठगी मुद्दामा पूर्पक्षका लागि थुनामा राख्ने आदेश दिएको छ । न्यायाधीश कृष्णराम कोइरालाको इजलासले परदेशीलाई थुनामा राख्ने आदेश दिएको हो ।
ठगी अभियोगमा पक्राउ परेका परदेशीको बयान र थनुछेक बहसपछि अदालतले कारागार चलान गर्ने आदेश दिएको हो । उनीविरुद्ध विपन्नलाई एक पटक ऋण दिएर पटक–पटक ऋण दिएको कागज गराउँदै ठगेको आरोप छ । परदेशीले ऋणको ब्याज बुझाउन जाँदा उल्टै अर्को पटक ऋण दिएको नक्कली कागज बनाएर ठगेको भन्दै पीडितले प्रहरीमा उजुरी गरेका थिए ।
एउटै मान्छेको नाममा ऋण दिइएको कानुनी कागज गर्न नमिल्ने भएकाले परदेशीले आफ्ना परिवारका सदस्यका नाममा समेत कागज गराउँदै आएका थिए । उनीविरुद्ध एक दर्जनभन्दा बढीको उजुरी परेको थियो । जिल्ला अदालतका नायव सुब्बा दिनेश मिश्रले परदेशीलाई पूर्पक्षका लागि थुनामा राख्ने आदेश भएको पुष्टि गरे ।
