मुसिकोट । जिल्ला समन्वय समिति रुकुम पश्चिमको प्रमुख, उपप्रमुख र सदस्यमा नेकपा माओवादी केन्द्रका उम्मेदवार निर्विरोध निर्वाचित भएका छन् । प्रमुखमा नेकपा माओवादी केन्द्रकी लुम्बिनी गौतम र उपप्रमुखमा माओवादीकै देवबहादुर कामी निर्विरोध निर्वाचित हुनुभएको छ ।
अन्य दलको उम्मेदवारी नपरेपछि नेकपा माओवादी केन्द्रका उम्मेदवारहरु निर्विरोध निर्वाचित भएका हुन् । मुख्य निर्वाचन अधिृकृतको कार्यालयले आज औपचारिक रुपमा घोषणा गरेको हो ।
समन्वय प्रमुखमा निर्वाचित गौतम जिल्लाको आठबीसकोट नगरपालिका वडा नम्बर १० बाट वडा सदस्य र उपप्रमुखमा निर्वाचित कामी सानीभेरी गाउँपालिका वडा नम्बर ३ बाट वडा सदस्यमा निर्वाचित हुनुभएको थियो ।
यस्तै ७ सदस्यमा पनि माओवादी केन्द्रका उम्मेदवारहरु निर्वाचित भएका छन । मुख्य निर्वाचन अधिकृतको कार्यालयका अनुसार सदस्यमा देउभान ओली, कृष्णबहादुर यरी, रामकुमार गौतम, मीना विक, गीताकुमारी केसी, शारदा दमाई, र गीता नेपाली निर्वाचित हुनुभएको हो ।
नव निर्वाचित प्रमुख, उपप्रमुख र सदस्यहरुले आजै सपथ ग्रहण गरेका छन । समन्वय प्रमुख गौतमले मूख्य निर्वाचन अधिकृत समक्ष र उप प्रमुख सहित अन्य सदस्यहरुले प्रमुख गौतम समक्ष सपथ ग्रहण गरेका हुन ।
पद तथा गोपनियताको सपथ ग्रहण पश्चात समन्वय प्रमुख लुम्बिनी गौतमले आजै पदभार ग्रहण गर्नुभएको छ ।
