मुसिकोट । रुकुम पश्चिमको मुसिकोट नगरपालिका वडा नम्वर १३ का ६० घर पूर्ण रुपमा क्षति भएका छन् ।
शुक्रबार जाजरकोट केन्द्रबिन्दु भएर आएको भूकम्पको कारण वडाका ६० घर पूर्ण रुपमा क्षति भएको वडा अध्यक्ष खलबहादुर खड्काले जानकारी दिनुभयो ।
वडा कार्यालयले प्रहरीसँगको समन्वयमा संकलन गरेको क्षतिको लगत विवरण अनुसार यस वडामा ४१५ घर आंशिक रुपमा क्षति भएका छन् । वडामा रहेको ७३० घरधुरी रहेका छन् ।
वडा अध्यक्ष खड्काका अनुसार घर पूर्ण रुपमा क्षति भएका परिवारहरु त्रिपालको समेत अभाव रहेको छ । अहिलेसम्म ८० वटा त्रिपाल र ११ वटा ब्याङकेट मात्र वडामा प्राप्त भएको उहाँले बताउनुभयो ।
खड्काले भूकम्प प्रभावित परिवारहरुको लागि तत्काल त्रिपाल र ब्याङकेट जरुरी रहेको उल्लेख गर्नुभयो । हाल वडामा प्राप्त भएका सामाग्री चितवनका युवाहरुले उपलब्ध गराएका हुन् ।
