मुसिकोट । रुकुम पश्चिम प्रहरीले हत्याको आरोपमा एक जनालाई पक्राउ गरेको छ ।
जिल्लाको मुसिकोट नगरपालिका वडा नम्वर १२ जुम्लाबाङका ५१ वर्षिय हस्तराम खड्काको हत्या गरेको आरोपमा सोही वडाका २३ बर्षिय डिल्लीरमण खड्कालाई पक्राउ गरेको जनाएको छ ।
मृतक हस्तराम र हत्या आरोपी डिल्लीरमण बाजे नाती हुन् ।
जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक धर्मेन्द्र खड्काले हत्या आरोपी खड्कालाई रगत लागेको चप्पलसहित पक्राउ गरेको जानकारी दिनुभयो । उहाँका अनुसार खड्काले सामान्य विवादको क्रममा उत्तिस जातको काठको मुडाले टाउकोमा प्रहार गरि हत्या गरेको स्वीकार गरेका छन ।
पक्राउ परेका आरोपि खड्कालाई हिरासत कक्षमा राखेर घटनाको थप अनुसन्धान गरिरहेको प्रहरीले जनाएको छ ।
शुक्रबार बिहान मुसिकोट नगरपालिका-१२ जुम्लाबाङ बुगेरीस्थित बैरागी ठाँटिबाट त्रिवेणीतर्फ जाने सडक छेउमा हस्तरामको शव भेटिएको थियो ।
