मुसिकोट । रुकुम पश्चिमको सानीभेरी गाउँपालिका वडा नम्बर ५ मा भोलि हुने उपनिर्वाचनका लागि सम्पूर्ण तयारी पूरा भएको छ ।
गाउँपालिकाको वडा नम्बर ५ मा वडाअध्यक्ष पदको लागि हुन लागेको उपनिर्वाचनको सम्पूर्ण तयारी पुरा भएको जिल्ला निर्वाचन कार्यालय रुकुम पश्चिमले जनाएको छ ।
भयरहित र निष्पक्ष रुपमा वडाको मतदान सम्पन्न गराउन नेपाल प्रहरी र सशस्त्र प्रहरी परिचालन गरिएको छ । आइतबार बिहान ७ देखि साँझ ५ बजेसम्म मतदान हुने छ।
एक वडाध्यक्ष पदका लागि २ उम्मेदवार प्रतिस्पर्दामा छन् । नेपाली काँग्रेसका तर्फबाट मोतिराम खत्री र नेकपा (माओवादी केन्द्र) का तर्फबाट जसीराम बस्नेत उम्मेदवार रहेका छन् ।
जिल्ला निर्वाचन अधिकारी मोहनलाल केसीका अनुसार यस वडामा कुल १४ सय ३४ मतदाता रहेका छन् । मतदातामध्ये ७ सय ४४ पुरुष र ६९० महिला रहेका छन् ।
सहायक निर्वाचन अधिकृत गोविन्दप्रसाद कोइरालाले निर्वाचनको सबै तयारी पूरा भएको बताउनु भयो । उहाँका अनुसार उपनिर्वाचनका आवश्यक निर्वाचन सामग्री मतदान स्थलमा पुगेको छ । नेपाल राष्ट्रिय मावि घापाघारमा क र ख गरि दुई वटा मतदान केन्द्र कायम गरिएको छ ।
२०७९ सालमा भएको स्थानीय तह निर्वाचनमा नेपाली कांग्रेसको तर्फबाट वडा अध्यक्ष पदमा निर्वाचित हुनुभएका अलबहादुर खत्रीको गत वर्ष उपचारको क्रममा निधन भएको थियो।
