काठमाडौँ। साउदी अरबकी महिला अधिकारवादी लुजैना अल–हथल्ललाई पाँच वर्ष आठ महिनाको जेल सजाय सुनाइएको छ । महिलाहरूले गाडी चलाउन पाउने अधिकारको वकालतसमेत गरेकी लुजैनालाई आतङ्कवादविरुद्धको अदालतले सजाय सुनाएको बीबीसीले जनाएको छ ।
अदालतले राष्ट्रिय सुरक्षामा क्षति पुर्याउन खोजेको र देशमा विदेशी मुद्दाहरूलाई अघि बढाएको आरोपमा उनलाई दोषी ठहर गरेको हो । ३१ वर्षीया लुजैनाले अहिलेसम्म साढे दुई वर्षभन्दा बढी जेल जीवन बिताइसकेकी छिन् ।
अन्तर्राष्ट्रिय मानव अधिकारवादी संस्थाहरूले पटक–पटक उहाँलाई रिहा गर्न माग गर्दै आएका छन् । लुजैना र उनका परिवारले भने सबै अभियोग अस्वीकार गरेका छन् । उनलाई साउदी महिलाहरूलाई सवारी हाँक्न अनुमति दिइनुभन्दा केही हप्ताअघि पक्राउ गरिएको थियो । मानव अधिकारवादीहरूले उनको सुनुवाइमा अन्तर्राष्ट्रिय मापदण्ड पूरा नभएको बताएको खबरमा उल्लेख छ ।
