काठमाडौँ । नेपाल पत्रकार महासंघले सरकार बनाउने लगायतको पहल राष्ट्रपतिबाटै हुनुपर्नेमा जोड दिएको छ।
यसको लागि सहजीकरण गर्न पत्रकार महासंघ लगायतका ६ वटा पेशागत सञ्जाल (पापड) तयार रहेको महासंघले जनाएको छ।
बिहीबार महासंघले विज्ञप्ति प्रकाशित गरी ‘वर्तमान संविधानले निर्धारण गरेको प्रक्रिया र संस्थाहरु मार्फत नै समाधान खोज्दै मुलुकलाई सहज निकास दिनु पर्दछ’ भनेको छ।
सबै राजनीतिक समस्या समाधानको प्रयास राष्ट्रपति कार्यालयबाट हुनुपर्छ, जंगी अड्डाबाट होइन भन्ने महासंघको ठहर रहेको छ।
तर पछिल्लो समय शान्ति सुरक्षा कायम गर्न सेनाले खेलेको भूमिका सराहनीय रहेको पनि महासंघको भनाई छ।
‘जेनजी पुस्ताले उठाएको संरचनात्मक सुधारका मागलाई समेटदै लोकतान्त्रिक गणतन्त्रको संरक्षण गर्दै थप उपलब्धि हासिल गर्न जरुरी छ’ अध्यक्ष निर्मला शर्माले जारी गरेको विज्ञप्तिमा भनिएको छ, ‘संयम र संवेदनशील भएर इतिहासको यो कठिन र निर्णायक मोडमा जिम्मेवार बन्न सबै सरोकारवाला पक्षलाई महासंघ हार्दिक अपिल गर्दछ।’
