मुसीकोट । नेपाली काँग्रेस रुकुमको सातौ जिल्ला अधिवेशन अन्तर्गतको प्रथम नगर/गाउँपालिका अधिवेशन आज हुदैछ । जिल्लाका ६ ओटै पालिकाहरुमा अधिवेशन सम्पन्न गर्नको लागि निर्वाचन अधिकृत पठाईसकिएको नेपाली काँग्रेस रुकुमले जनाएको छ ।
नेपाली काँग्रेस रुकुम पश्चिमका सभापति प्रेम प्रकाश ओलीका अनुसार सबै पालिकाहरुमा सहमति मार्फत नयाँ नेतृत्व चयनको प्रयास भैरहको छ ।
प्राप्त जानकारी अनुसार मुसिकोट नगरपालिकामा नगर सभापतिको लागि दुई जनाको तिब्र आकांक्षा देखिएको छ । काँग्रेसका नेताहरु समिरजंग मल्ल र प्रेमबहादुर ओली बिचमा सहमतिको प्रयास जारी रहेको रुकुम काँग्रेसले जनाएको छ ।
त्यसैगरी चौरजहारी नगरपालिकामा प्रेमबहादुर ओली, भद्रबहादुर बिष्ट र गणेश डाँगी नगर सभापतिको दाबेदारीमा रहनुभएको बुझिएको छ । उहाँहरु बिचमा सहमतिको प्रयास भैरहेको नेपाली काँग्रेसका जिल्ला सभापति प्रेमप्रकाश ओलीले जानकारी दिनुभयो ।
जिल्लाको आठबिसकोट नगरपालिकामा नगर सभापतिमा काँग्रेस नेता धिरेन्द्र बटाला, तारक शाही र अमृत बोहरा बिच सहमतिको प्रयास भैरहेको छ । सहमतिबाट अमृत बोहरा नगर सभापतिमा सर्वसम्मत हुने सम्भावना रहेको छ ।
यसैगरी जिल्लाको त्रिवेणी गाउँपालिकामा दिपेन्द्र ओली र प्रेम खड्का बिचमा गाउँ सभापतिको लागि सहमतिको प्रयास भैरहेको जनाईएको छ । सानीभेरी गाउँपालिकामा भने कर्मु डाँगी, सन्तोष रोका र बलबहादुर बि.क.ले सभापतिको दाबी गर्नुभएको छ ।
जिल्लाको बाँफिकोट गाउँपालिका भने जनक कुमार बाँठा गाउँपालिका सभापति सर्वसम्मत हुने अवस्था रहेको जनाईएको छ ।
जिल्लाभर करिब १ हजार २ सय ४१ जनाा क्षेत्रिय प्रतिनिधिहरु रहेका छन् । क्षेत्रिय प्रतिनिधिहरुले नै नगर तथा गाउँपालिकामा नयाँ नेतृत्व चयन गर्नेछन् ।
