मुसिकोट । रुकुम पश्चिमको आठबिसकोट नगरपालिकामा प्रथम मेयर कप खेलकुद प्रतियोगिता सुरु भएको छ । बालकल्याण माविको खेल मैदानमा आयोजित प्रतियोगिताको शुक्रबार नगर प्रमुख रवि केसिले उद्घाटन गर्नुभएको छ ।
आठबिसकोट नगरपालिका नगर खेलकुद विकास समितिको आयोजनामा आज बाट सुरु भएको खेलकुद प्रतियोगिता आईतबार सम्म सञ्चालन हुने जनाइएको छ ।
नगरपालिकालाई खेलकुदको हवको रुपमा विकास गर्न नगर स्तरमा बिभिन्न खेलकुद प्रतियोगिता संचालन गरिँदै आएको नगर प्रमुख केसिले जानकारी दिनुभयो । उहाँले भन्नुभयो, ‘प्रथम मेयर कप भलिवल प्रतियोगिता यसैको निरन्तरता हो ।’ सबै वडाका खेलाडी छनौट खेल मैदान बनाउने योजनाका साथ नगरपालिका अगाडि बढिरहेको जानकारी दिनुभयो ।
नगर प्रमुख रबि केसिको प्रमुख आथित्यता रहेको कार्यक्रमको सञ्चालन नगर खेलकुद विकास समितिका सदस्य मनोज शाहीले गर्नुभएको थियो । नगर खेलकुद विकास समितिका अध्यक्ष विकका अनुसार आठबिसकोट नगरपालिकाका १४ वटै वडाका खेलाडीहरु बीच प्रतिस्प्रर्धा हुने छ ।
प्रतियोगिताको प्रथम पुरस्कार क्रमशः प्रथम, दोस्रो र तेस्रो हुनेले ५० हजार ३० हजार र २० हजार हात पार्ने जनाईएको छ ।
