काठमाडौँ । सिरहामा रोकिराखेको ट्याक्टरमा ठोक्किँदा मोटरसाइकलमा सवार दुई जनाको मृत्यु भएको छ । एक जना गम्भीर घाइते भएका छन् । गएराति ८ बजेतिर सिरहा चौहर्वा सडकखण्डअन्तर्गत नरहा गाउँपालिका-५ मा बिग्रिएर रोकिराखेको ज १ त ४३२९ नम्बरको ट्याक्टरमा चौहर्वाबाट सिरहातर्फ आउँदै गरेको अनटेस्ट मोटरसाइकल ठोक्किएर दुर्घटना भएको सिरहा प्रहरीका प्रवक्ता बिनोद घिमिरेले बताए ।
दुर्घटनामा गम्भीर घाइते भएका मोटरसाइकमा सवार तीनै जनालाई उपचारका लागि लहान पठाइए पनि दुई जनाको मृत्यु भएको छ । मृत्यु हुनेमा सिरहा नगरपालिका ५ बस्ने बिसनदेव महतोका १९ वर्षीय छोरा अमलेश महतो र रामवृक्ष सदाका २१ वर्षीय छोरा सुनिल सदा छन् ।
यस्तै मोटरसाइकलमा पछाडि बसेका मिथिलेश सदा गम्भीर घाइते भएका छन् । उनको लहानमा प्राथमिक उपचारपछि थप उपचारका लागि बिराटनगर पठाइएको प्रहरीले जनाएको छ ।
