मुसिकोट । रुकुम पश्चिमको बाँफिकोट गाउँपालिका-३ दारकाट्यामा आगलागी हुँदा एक जनाको मृत्यु भएको छ ।
आज दिउँसो ३ बजे ढारपाखा सामुदायिक वनबाट फैलिएको आगो गाउँमा पस्दा ७० वर्षिया बुदि कामीको मृत्यु भएको वडाध्यक्ष तिलवीर केसीले जानकारी दिनुभयो ।
वडा अध्यक्ष केसीका अनुसार घरमा आगो सल्केपछि घरभित्र रहेका गहना निकाल्न भन्दै घरभित्र छिरेकी कामीको जलेर मृत्यु भएको हो । वन क्षेत्रबाट गाउँतर्फ फैलिएको आगोले तीन वटा घर जलेर नष्ट भएका छन् ।
अहिलेसम्म आगो नियन्त्रण हुन नसकेको वडा अध्यक्ष केसीले बताउनुभयो । स्थानीयवासी र ईलाका प्रहरी कार्यालय बाँफिकोटबाट गएको प्रहरी टोलीले आगलागी नियन्त्रणको प्रयास गरिरहेको छ ।
ढारपाखा सामुदायिक वनबाट सुरु भएको आगो अहिले भित्रिखोला सामुदायिक वन, साइकुमारी सामुदायिक वनमा फैलिएको छ ।
घरमा आगलागी हुँदा भएको क्षतिको विवरण भने अझै सङ्कलन हुन सकिरहेको छैन।
