कोरोना भाइरस् संक्रमणको जोखिम बढिरहेका बेला काभ्रेलाञ्चोकको बनेपा नगरपालिकामा रहेका गर्भवती तथा सुत्केरी महिलाको निःशुल्क कोभिड–१९ बीमा थालिएको छ। नगरले ‘उपप्रमुखसँग महिला कार्यक्रम’अन्तर्गत उक्त अभियान शुरु गरेको हो।
नगर उप्रमुख रेखा दाहाल सापकोटाले बुधबार एक कार्यक्रमकाबीच बीमा कम्पनीसँग सम्झौता गरेलगत्तै अभियानको सुरूवात भएको हो। ‘बीमाले स्वास्थ्य जोखिममा रहेका महिलाको हौसला थपिएको छ, यसले आर्थिक अवस्था कमजोर भएका महिलाको मनोबल उच्च राख्नेछ’, उनले भनिन्। उनले कार्यक्रमको सुरूवातसँगै दुवै समूहका ५१ महिलालाई कोभिड–१९ बीमालेख हस्तान्तरण गरेकी छन्।
सापकोटाका अनुसार कार्यक्रमले हाल नगरका गर्भवती तथा डेढ महिनाको सुत्केरी महिलालाई समेट्नेछ। उनले नगरभित्रका दुवै समूहका ४ सय महिलाको निःशुल्क कोभिड–१९ बीमा गरिने जानकारी दिएकी छन्।
‘उपप्रमुखसँग महिला कार्यक्रमअन्तर्गत यस वर्ष यही बीमा हो’, उनले भनिन्। उनका अनुसार नगरका १४ वडामा हालसम्म पहिचान भएका २३५ गर्भवती र १६५ डेढ महिनाका सुत्केरीको पहिलो चरणमा निःशुल्क कोभिड–१९ बीमा गरिनेछ। प्रिमियम रकममा ५० प्रतिशत छुटमा एक लाखको बीमा हुने जनाइएको छ।
संक्रमणको जोखिम बढिरहेको वर्तमान अवस्थामा गर्भवती र सुत्केरीको निःशुल्क कोरोना बीमा गर्ने निर्णय गरिएको नगरप्रमुख लक्ष्मीनरसिं वादेले बताए। उनले भने, ‘बीमाले महिलामा रोगसँग लड्ने मानसिकताको थप विकास हुने अपेक्षा गरेका छौँ।’उनका अनुसार हाल नगरमा सक्रिय संक्रमित महिला ४० र ६६ पुरुष रहेका छन्। यसअघि नगरले जनप्रतिनिधि र कर्मचारीको बीमा गरिसकेको जनाएको छ।
यसैगरी पाँचखाल नपा–४ का वडाध्यक्ष सुन्दर लामाले साताअघि एकल महिलाको आफैले निःशुल्क कोभिड–१९ बीमाको प्रक्रिया थालेका थिए। लामाले आफ्नो क्षेत्रमा पहिचान भएका १ सय २८ एकल महिलाको निःशुल्क कोभिड–१९ बीमा गरिरहेको बताए। ‘प्रिमियम रकममा ५० प्रतिशत छुटमा उनीहरूको बीमा गर्न लागेको हुँ’, उनले भने। रासस
