मुसिकोट । नेपाल विद्युत प्राधिकरण रुकुम पश्चिम वितरण केन्द्रले चुहावट नियन्त्रण अभियानलाई तिब्रता दिएको छ । पछिल्लो समय जिल्लाका ग्रामिण बस्तीहरुमा विद्युत चुहावट बढेपछि यसको नियन्त्रणको लागि अभियान तिब्र रुपमा चलाएको छ ।
जिल्लामा केहि घरधुरिले मिटर नै जडान नगरी चुहावटका आधारमा बत्ति बालेको सुचना प्राप्त भएपछि चुहावट नियन्त्रणको अभियान तिब्र पारिएको नेपाल विद्युत प्राधिकरण रुकुम पश्चिमका कार्यालय प्रमुख त्रिलोचन भट्टराईले जानकारी दिनुभयो ।
शुक्रबार मात्र बाँफिकोट गाउँपालिकाको वडा नम्बर ७ बास्तोला गाउँमा ३ दर्जन घरले चुहावटका आधारमै बत्ति बालेको सुचना पश्चात चुहावट नियन्त्रणको टोली त्यहाँ खटिएको थियो । बास्तोला गाउँबाट नियन्त्रणको टोलीले विद्युत चुहावट गर्न प्रयोग गरिएका केही थान बासको भाटा र केवल तार जफत गरेको छ ।
यो अभियान जिल्लाका अन्य ठाउँमा पनि सञ्चालन गरिने जनाइएको छ ।
विद्युत चोरी गैरकानुनी कार्य भएकाले र यसरी चुहावट गर्दा करेन्ट लागेर जनधनको समेत क्षति हुने हुनाले कार्यालयमा सम्पर्क राखेर मिटर जडान गरेर मात्र विद्युत प्रयोग गर्न कार्यालय प्रमुख भट्टराईले अनुरोध गर्नुभएको छ।
