रुकुम पश्चिमको मुसिकोट नगरपालिका ३ खरखरेमा ट्याक्टर दुर्घटना भएको छ ।
बिहीबार राति साढे ११ बजे मुसिकोटबाट चौरजहारी जाँदै गरेको भे २ त १४६१ नम्बरको ईन्जिन मात्र भएको ट्याक्टर दुर्घटना हुँदा ६ जना घाईते भएका छन् ।
जिल्ला प्रहरी कार्यालयका प्रहरी निरीक्षक धर्मेन्द्र खड्काका अनुसार दुर्घटनामा परेर ट्याक्टरमा रहेका ६ जना घाईते भएका छन् । घाईते हुनेहरुमा चौरजहारी नगरपालिका १ का २४ बर्षिय ट्याक्टर चालक निर्मल थापा, सोहि ठाउँका २२ वर्षिय पारस बिष्ट रहेका छन् ।
त्यसैगरी उदयपुर जिल्लाको गडि गाउँपालिका ५ का २१ वर्षिय कृष्ण मगर, सोहि ठाउँका २१ वर्षिय पेशल मगर, २३ वर्षिय सुशिल राई र २१ वर्षिय सागर घाईते भएका रहेका छन् ।
घाईतेहरु चौरजहारी नगरपालिका १ मा रहेको सिटिईभिटीको भवन निर्माणमा काम गर्ने कामदारहरु हुन् । उनीहरुलाई लिएर चौरजहारीतर्फ जाँदै गरेको ट्याक्टर मध्यपहाडि राजमार्ग अन्तर्गतको खरखरे खण्डनेरबाट करिब १५० मिटर तल खसेको बताईएको छ ।
दुर्घटनाको जानकारी लगत्तै जिल्ला प्रहरी कार्यालय रुकुम पश्चिम र अस्थायी प्रहरी पोष्ट बागबजारबाट पुगेको प्रहरी टोलीले घाईतेहरुको उद्धार गरेको थियो । घाईतेहरुको उपचार अहिले जिल्ला अस्पताल सल्लेमा भईरहेको छ ।
