रुकुम पश्चिमको बाँफिकोट गाउँपालिका -२ कुनाखेतमा एक पुरुषको शव भेटिएको छ ।
जिल्ला प्रहरी कार्यालयका अनुसार रुकुम पूर्वको पुथा उत्तरगंगा गाउँपालिका ५ हुकाम घर भई हाल रुकुम पश्चिमको मुसिकोट नगरपालिका वडा नम्वर १ पातुखोला बस्ने ४७ वर्षिय लिला बहादुर घर्तीको शव सोमबार दिउँसो फेला परेको हो ।
उक्त स्थानमा यहाँको चर्चित कुनाखेल मेला चलिरहेको छ । मेला हेर्न भनेर गएका घर्तीको शव मेला लाग्ने स्थान भन्दा करिब तीन सय मिटर तल फेला परेको जिल्ला प्रहरी कार्यालयका प्रहरी नायब उपरिक्षक नवराज पोखरेलले जानकारी दिनुभयो । उहाँका अनुसार सानीभेरी किनारमा उक्त शव फेला परेको हो ।
शव फेला परेको सूचना लगत्तै प्रहरी चौकी बाँफिकोटबाट प्रारम्भिक अनुसन्धानको लागि प्रहरी सहायक निरीक्षक बिष्णु चौधरीको कमाण्डमा एक प्रहरी टोली घटनास्थल पुगेको छ भने जिल्ला प्रहरी कार्यालयबाट प्रहरी निरीक्षक ऋषि पाठकको नेतृत्वमा अर्को टोली घटनास्थल पुगेको छ ।
प्रहरीले घटनाको अनुसन्धान सुरु गरेको जनाएको छ ।
