सुर्खेतको वीरेन्द्रनगर नगरपालिकाभित्र रहेका चार सामुदायिक विद्यालयमा अध्ययनरत अति जेहेन्दार, विपन्न तथा अपाङ्गता भएका ३१ जना बालबालिकालाई बैंक, वित्तीय संस्था तथा निजी क्षेत्रले शैक्षिक छात्रवृत्ति (बर्सरी) सहयोग गरिएको छ ।
सेभ द चिल्ड्रेनको सहयोग तथा समाज जागरण केन्द्र (स्याक) नेपालको आयोजनामा बैंक, वित्तीय संस्था र निजी क्षेत्रसँगको तेस्रो चरणको साझेदारी कार्यक्रमअन्तर्गत उक्त प्रतिबद्धता सार्वजनिक गरिएको हो। सामाजिक उत्तरदायित्व प्रवर्द्धन गर्ने उद्देश्यले सञ्चालन गरिएको अभियानमार्फत विभिन्न संस्था तथा व्यवसायीहरूले ३१ जना बालबालिकाको शैक्षिक सहयोगको जिम्मेवारी लिएका हुन्। कार्यक्रमअनुसार मुक्तिनाथ विकास बैंकले १२ जना, सानिमा बैंकले २ जना र लक्ष्मी सनराइज बैंकले २ जना बालबालिकाको शैक्षिक जिम्मेवारी लिएका छन्।
यस्तै अन्य बैंक, वित्तीय संस्था तथा निजी क्षेत्रका व्यवसायीहरूले एक–एक जना बालबालिकाको सहयोग गर्ने प्रतिबद्धता जनाएका छन्। सहयोग अवधि १ देखि ३ वर्षसम्म रहने जनाइएको छ। सहयोग गर्ने संस्थाहरूमा होटल नमस्ते, जागृति मोबाइल पसल, थकाली रेस्टुरेन्ट, मुना डिजाइन सेन्टर, न्यू प्रभात स्टेशनरी, नवदुर्गा छापाखाना, शुभ होटल, होटल स्टे भ्याली भ्यू, एस.एस. स्टेशनरी, के.पी. व्यावसायिक प्रालि, नेपाल उद्योग वाणिज्य महासंघ कर्णाली प्रदेश, डी नमस्ते होटल, लाइन्स क्लब अफ काँक्रेविहार सुर्खेत तथा मालिका डेस्कटप सुर्खेत रहेका छन्।
कार्यक्रममा बोल्दै सानिमा बैंक कर्णाली प्रदेश प्रमुख अम्बिका पोख्रेल र लक्ष्मी सनराइज बैंकका शाखा प्रमुख सुरेन्द्र प्रसाद कपाडीले छात्रवृत्ति प्राप्त गर्ने बालबालिकाले अध्ययनमा निरन्तरता, अनुशासन र लगनशीलता कायम राख्नुपर्नेमा जोड दिए। उनीहरूले सहयोगी संस्थाहरूले आफ्नो प्रतिबद्धतालाई निरन्तरता दिनुपर्ने बताउँदै यसले बालबालिकाको भविष्य निर्माणमा महत्वपूर्ण योगदान पुग्ने उल्लेख गरे। सेभ द चिल्ड्रेन सुर्खेत फिल्ड कार्यालयका कार्यक्रम व्यवस्थापक बालमुकुन्द महतले प्रारम्भिक चरणमा वार्षिक १२ हजार रुपैयाँका दरले छात्रवृत्ति सहयोग प्रदान गरिएको जानकारी दिए। उनले कार्यक्रमले बालबालिकामा सकारात्मक सोच विकास गर्नुका साथै अध्ययनप्रति थप प्रेरित गर्ने विश्वास व्यक्त गरे।
समाज जागरण केन्द्र (स्याक) नेपालकी अध्यक्ष मीनाकुमारी तिवारीको अध्यक्षतामा सम्पन्न कार्यक्रममा बैंक तथा वित्तीय संस्था, निजी क्षेत्र, सुर्खेत उद्योग वाणिज्य संघका प्रतिनिधि, पत्रकार, अभिभावक, शिक्षक तथा बालबालिकाको सहभागिता रहेको थियो। अध्यक्ष तिवारीले ‘बल्गेरिया मोडल’ मार्फत कर्णालीका बालबालिकाको शैक्षिक क्षेत्रमा योगदान पुर्याउने लक्ष्यसहित कार्यक्रम सञ्चालन गरिएको बताइन्। उनले निजी क्षेत्रलाई जेहेन्दार, अति विपन्न तथा अपाङ्गता भएका बालबालिकाको अभिभावकीय भूमिकामा उभिन आग्रह गरिन्।
कार्यक्रममा सहयोगी दाता र समाज जागरण केन्द्र (स्याक) नेपालबीच द्विपक्षीय सम्झौतासमेत गरिएको थियो। कार्यक्रमको उद्देश्य तथा स्वागत मन्तव्य सेभ द चिल्ड्रेनका वरिष्ठ कार्यक्रम संयोजक प्रेम पुनले राखेका थिए भने सञ्चालन स्याक नेपालका कार्यक्रम अधिकृत हरि कोइरालाले गरेका थिए।
