रुकुम पश्चिमका एक जना कोरोना सक्रमितको बाँकेको भेरी अस्पतालमा उपचारको क्रममा मृत्यु भएको छ । जिल्लाको आठबीसकोट नगरपालिका वडा नम्बर ६ का ६५ वर्षीय पुरुषको कोरोना सक्रमणबाट मृत्यु भएको हो ।
जिल्ला कोभिड व्यवस्थापन केन्द्र, बाँकेका फोकल पर्सन तेजबहादुर वलीका अनुसार माघ १५ गते भेरी अस्पतालमा पीसीआर गरिएका उहाँँलाई १६ गते कोभिड वार्डमा भर्ना गरिएको थियो । उहाँको आज मृत्यु भएको हो ।
कोभिडविरुद्धको कुनै पनि खोप नलगाएका कारण उहाँको अवस्था गम्भीर भएको अस्पतालको भनाई छ । स्वास्थ्यमा सुधार नआएपछि मृत्युभएको चिकित्सकले जनाएको फोकल पर्सन ओलीले बताउनुभयो ।
पछिल्लो समय सिकिस्त हुने तथा मृत्यु हुनेमा अधिकांश कोरोनाको कुनैपनि खोप नलगाएका संक्रमितहरु बढी रहेको उहाँले बताउनुभयो । सोही कारण सबैलाई कोरोनाका खोपहरु लगाउन पटक पटक आग्रह गर्दैआएको पनि ओलीले बताउनुभयो ।
जिल्ला कोभिड व्यवस्थापन समिति बाँकेकाअनुसार अहिलेसम्म बाँकेमा उपचाररत बाहिरी जिल्लाका ४४१ जना कोरोना संक्रमितको मृत्यु भएको छ । बाँकेका स्थानीय वासिन्दामध्ये ३४६ जनाको कोभिडबाट मृत्यु भएको अस्पतालले जनाएको छ ।
