चैत २४ रुकुम पश्चिम
कोरोना पुष्टि भएका कैलाली लम्कीका एक युवकसंगै नेपाल पसेका रुकुम पश्चिमका एक युवाको आज बिहान पहिचान भएको छ ।
मुसिकोट नगरपालिकाका निमित्त प्रमुख प्रशासकीय अधिकृत नरवीर खड्काले दिनुभएको जानकारी अनुसार भारतसँगका सबै नाका बन्द गरिएपछि चैत १२ मा नेपाल भित्रिएका रुकुम मुसिकोट नगरपालिका वडा नम्बर १ का २५ बर्षका युवाको पहिचान भएको हो ।
पहिचान भएका ती युवा अहिले बाँकेको राप्ती सोनारी गाउँपालिका वडा नम्बर ८ बालापुरमा आफन्तको सम्पर्कमा रहेका छन । उनी भारतको केरलामा मजदुरी गर्दै आएका थिए ।
आफन्तको घरमा आएको एक साता सम्म छुटै बसेका ती युवामा कोरोना भाइरसको कुनै लक्षण नदेखिएपछि परिवारको सल्लाहअनुसार आफन्तहरु सँग बस्दै आएका छन । अहिले उनको स्वास्थ्य अवस्था सामान्य रहेको प्रशासकीय अधिकृत खड्काले बताउनु भयो ।
विभिन्न व्यक्तिहरुले सामाजिक सञ्जाल लगायत सञ्चारमाध्यममा सोहि युवा नेपाल आएको र बेहबर भएको जानकारी हुनेबित्तिकै नगरपालिकाले उक्त युवाको खोजी गरेको थियो ।
