काठमाडौँ । नेपाल नागरिक उड्डयन प्राधिकरणले हवाई इन्धनको मूल्य घटेपछि आन्तरिक उडानमा लागू हुने ‘फ्यूल सरचार्ज’ पुनर्निर्धारण गर्दै नयाँ भाडादर कार्यान्वयनमा ल्याएको छ।
प्राधिकरणका अनुसार नेपाल आयल निगमले हवाई इन्धनको मूल्य प्रतिलिटर ४० रुपैयाँले घटाएपछि त्यसको प्रभावअनुसार फ्यूल सरचार्ज समायोजन गरिएको हो। नयाँ दर बुधबारदेखि लागू भएको छ भने यसबारे सबै आन्तरिक वायुसेवा कम्पनीलाई जानकारी गराइसकिएको प्राधिकरणले जनाएको छ।
संशोधित व्यवस्थाअनुसार केही गन्तव्यमा फ्यूल सरचार्ज अधिकतम दुई हजार ३३५ रुपैयाँसम्म घटेको छ। नेपालगन्ज-भद्रपुर उडानमा यसअघि १५ हजार ७२५ रुपैयाँ रहेको फ्यूल सरचार्ज अब १३ हजार ३९० रुपैयाँ कायम गरिएको छ।
यस्तै, काठमाडौँ-धनगढी उडानमा ११ हजार ८८५ रुपैयाँबाट घटाएर १० हजार १२० रुपैयाँ तथा काठमाडौं–सुर्खेत उडानमा नौ हजार २९५ रुपैयाँबाट घटाएर सात हजार ९१५ रुपैयाँ निर्धारण गरिएको छ। काठमाडौँबाट सञ्चालन हुने माउन्टेन फ्लाइटका लागि लागू फ्यूल सरचार्ज पनि नौ हजार २३५ रुपैयाँबाट घटेर सात हजार ८६० रुपैयाँमा कायम भएको छ।
प्राधिकरणले फ्यूल सरचार्ज कुल हवाई भाडाको एउटा अंश मात्र भएको स्पष्ट गर्दै अन्तिम टिकट मूल्य निर्धारण गर्दा अन्य शुल्कसमेत समावेश हुने जनाएको छ। साथै, प्राधिकरणले तोकेको अधिकतम भाडादरभन्दा बढी शुल्क लिन आन्तरिक वायुसेवा कम्पनीलाई अनुमति नहुने व्यवस्था यथावत् रहेको उल्लेख गरेको छ।
यस्तो छ नयाँ कायम गरिएको फ्यूल सरचार्ज :
